periodicociudadrealhoy

JA SMERANIL SUTJEL SB'AJI
XXXI DOMINGO ORDINARIO


+Mons. Enrique Díaz Díaz
Obispo Auxiliar
Diócesis de San Cristóbal de Las Casas.

"K'oti ja b'a Jeriko sb'i'il jun chonab'. Ti ek'a b'a yoj chonab' jawi. Tey jun winika, sb'i'il Sakeo, ye'n mandaranum b'a k'anakontribusyon:Mero niwan jnal ja ye'na. Wa sk'ana oj sna' sb'aj ja Jesusi. Mi xb'ob' yil jel jitzan ixuk winik jumasa'i. Yuj ja jel kusan sb'akel ja ye'ni. Ti waj ajnel b'ajtana ja b'a sti' sat ja ixuk winik jumasa'. Ti k'e' t'ukan b'a jun te' b'a oj b'ob' yile. Yuj ja ti oj ek'uki ja Jesusi.
< Yajni ek'i ja b'a luwar jawi ja Jesusi ti sk'ela k'e'a , ti yala yab'a: ja we'n Sakeo, ko'an wewo, ja ya'ni ti oj kankon ja b'a wanaji. Jutzin ko'i, ti yi'aj ja Jesusi b'a snaja. . Jel tzamal yila. Yajni yilawe' ja tuki ti och slo'iltaye'a. Ti yalawe'a: ti och kana b'a oj jijluk b'a snaj jun winik mulanum.
Ja Sakeo ti waj b'a sti' sat ja Kajwaltiki ti yala'a: K'ela awil Kajwal, snalan ja jastik jb'aji oj jk'ep yi' ja ma'tik mi jas yi'oje'i, ta ay k'a ka'a el yi'le tak'in b'a mi sb'ejuki ojni ka' pax yi'le chan majke mas. Ti yala ja Jesusi: ja ya'an k'ak'uji ti k'ot ja skoltajel ja b'a na'itz iti, yuj ja jnal iti ja'ni yintil ja Abrami. Ja yunin ja winiki jaki b'a oj sle' b'a oj skolta ja ma'tik ch'ayel ayi." )Lucas 19, 1-10)
Oj ma jsutu jb'ajtik
Jun yal ujch'im winik
Ja yajni ja sb'ejlal jumasa' wa sta'a sb'aje'I
La'xa oj ko'tik ko'e ja b'a te'i
Ja smeranil sutjel sb'aji
Ja yajni Sakeo wa sxeta ja yab'ali sok ja swa'eli sutu sb'aji. Ja xetub'al yab'al sok ja swa'eli wa stukb'ese ja altzilal jumasa'. Jasunk'a ma aljita yab'i ja Sakeo yuj ja Jesusi. Jasunk'a sk'ulan ja Jesusi b'a oj stukbuk ja yaltzilal ja tan winik jawi. Mi x'alji kab'tik yuj ja lekil yab'al, pe mi b'i ja'uk ja yutajeli ma ja sk'omjeli, ta mi k'a ja skapjeli, ja'yuj scholota sb'aji. Mi nab'enuk ja jas yalata ma sk'ulan ja Jesusi, pe wa xchijk'aji ja yajni sta'ata sb'aje'i smeranil stukb'es sb'aj ja Sakeo: wa sxeta ja sjastikili sok ja yal ak'inte'i: "K'ela áwil Kajwal, ja snalan ja jastik jb'aji oj jk'ep yi' ja ma'tik mi jas yi'oje'i, ta ay k'a el yi'le tak'in b'a mi sb'ejuki ojni ka' pax yi'le chan majke mas". Ja yajni wa xta'a jb'ajtik sok ja Jesusi wa stukb'es ja kaltziltik, wa xcholo jb'ajtik sok, ja'xa wa xk'ela laman leman ja kala jmojtik jumasa'i. Ja yajni wa xta'a jb'ajtik sok ja Jesusi cha wa xta'a jb'ajtik sok ja kala mojtik jumasa'i. Jel t'ilan oj jcholtik ja iti b'a chikan jas jchonab'altiki: oj chijn'ajuk kujtik ja mero smeranili. Ja Jesusi. Mi xb'ob' oj ka'tik ochuk ja b'a kaltziltik ja Jesusi ta wa xlututik yi'le ja kala jmojtik jumasa' ja slutulab'il. Mi xb'ob' oj jtzajlatik ja Jesusi ta wa xka'atik yi' ja jpatiki ja kala jmojtik jumasa', ja'xa ta wa xle'a kechanxta ja lekil jlekilaltiki, mi kocheluktik ja smeranili. Jutzin jutzin ma wa xtukb'es jb'ajtik. Jach' wa sje'a ki'tik ja San Lukasi, pe' ja Sakeo stukb'es sb'aji takal takal, k'ak'u k'ak'u iljita yuj ja sk'ujoli, sna'ata sb'aj ja jas kapji yi' yuj ja Jesusi.
< Jasunk'a ma t'ilan oj jk'ultik b'a oj jtukb'es jb'ajtik meran k'ak'u k'ak'u. Jastal ma ta wa xta'a jb'ajtik sok ja Jesusi oj cho jta' jb'ajtik sok ja kala jmojtik jumasa'. Jastal ma oj tojb'uk ti b'a snalan ja jnolantiki ja yojyal jumasa' ja jastal wa sje'a ki'tik ja Jesusi. JACH'NI'A.