periodicociudadrealhoy

Mindadecha
Epifanía Achaatieri


+Mons. Enrique Díaz Díaz
Obispo Auxiliar
Diócesis de San Cristóbal de Las Casas


Jesúsï kanasti Belenio Judea anapu, tsïma nitamakuaecharu enga t´aresï Herodes irekampka. Maru t´aresïecha Oriente anapu jimajkani niarasptiks Jerusalenio ka k´uranguaresptiks: "¿Nani jaraski t´aresï judioecheri enga iasï sanu uekatsenuka? Jimboka exeskaks imaeri joskuni ka juraskaks uandatsekuaerekuni".
Enga mitepka, t´aresï Herodes jaakuarespti ka istu iamindu Jerusalén. Ioareaspti k´eri Tata kuraechani ka karariechani ireta anapu ka k´uramariaspti nanisï kanapirini Mesiasïni. Tsima mokukuntaspti: ´Belenio Judá anapu, jimboka isï karantasti profeta: Ka t´u, Belén, echeri juda anapu, nori jindestka ireta sanderu sapichu Judea anapu, jimboka t´uri ueranaka ma k´eri juramuti, jindeuati karichi eranguti juchiiti iretaeri, Israel´.
Jimajkani Erodesï ioareaspti t´aresïechani, par tsïma aripiringa naki jandusï xarakuapi josku ka axaspti Belenio, arhiaparini: "Nie k úrangurini ambesï ukuare ima sapichu, ka eka cha exentaaka, eianguntejtsïni par jijtuni nirani uandatsekuarekuni".
Tatsekua eka tsïma kurajchapka t´aresïni, tanimu t´aresïecha uenasptiks xanarakuareni, ka majku ima josku enga exepkasï xarakkuantaspti ka erandukuasïrampti niaraparini jimangui ima japka sapichu. Ka ekaksï menderu eratentapka imani joskuni, kanekua tsïpentasptiks. Inchasptiks k´umanchikuaru ka exentasptiks Maríani, amamba, ka t´kuixuriparini, uadatsekuarekusptiks. Tatsekua, mitasptiks tsïmaeri cofrechani, intsïmbeasptiks: tiripiti, incienso ka mirra. Tanarikuaru arinasptiks eska noteruksï k´unatsentapiringa exentani Erodesïni, k´uanatsentasptiks materu xanari isï. (Mt 2, 1-12)
No jatsiaparini mindaechani
Nomeksï eratsentasptiksï ambesï ukuarepirini. Ambaruskasptiks xanarini ega no sesi japka porotaecha járurasptiks iapuru isï, enga anchikuarini japkasï jurajkuasïptiks kutsari iopekua ukata, per noksï jatsikuasptiks ¡ma minda! Kutsari churekuaru ojchakuraspti minda urapiti xanarueri, churekua, janikua ka xumu urapiti kunguarentasïptiks. Isï uiripekua jukandurakuaecha isïku inchamasïramptiks ka perjpakurisïramptiks, majku kuntperasïramptiks o ueramasïramptiks xarariiru isï. Jaranaspti ma uariri, uanekua atakataecha ka tsinchekuaresptiks kanekua ambe. Nesï k´amanarintsikua jatsi, xanariru istuesi eska irekakuaru, enga no ambe minda jatsinajka no usïndi ma xanarakuareni.
Epifanía
Mentku isï jucha k´uinchentasïnga Epifanía 6 eneru juriatekuaru, Tata Diosïo k´uichenantasïndi ma uenakuaru domingo uexurinieri. Kurajchasïkaks Tata Diosïri uandakua enga jatsichiajkasïni uanekua mindaechani Tata Kristueri enga juchanguni jaka terujkaniru iretaecharu. Kanekua uandanasïndi eska ma josku japka, enga tsïma t´aresïecha exepka. Pero sanderu jukaparakua jukasti uandakua Tata San Mateoeri indengui uekajka jorendansïni joskunguni. Eiamenaspti ma erajkukua par Israel ireta, imangui isï xanarampka churekuaru ka erokampka imani erajkukuani. Xararastia Mesíasï eska ma k´eri erajkukua indemgui kejtataka churekuani, per iasï, arhí k´uinchikua Epiufaníaeri jurasïndi mitachinsïni eraxamakuechani ka arhíntsïni eska Jesúsï, Emmanueli, no jirikuaresïnga, intsïnbekuaresïnga par iaminduecha k´uiripuechani.
Ma josku indengui eiankpejka
Eska na arhíntajaka Tata San Mateo nitakuarentasïndi ma eraxamakua irekakuaru discípulueri indengui jirinajka chuxani Jesúsïni. Eranguparini joskuni ka uejpekua par chuxani, enga exentaaka Sapichuni indengui amamba kamaririni jaka, eraakuaresïndi ma k´eri xanari, indengui no k´amarajka, choperi, p´inaskuaechanguni, churekuaecha ka maruteru ambe indengui no uekanajka. Menchani noksï eratentasïngaksï joskuni o menchani tsïnchesïndi. Ka k´uramguarentasïngaksï ka sesi eiangunasïngaksï. Ma xanari choperi indengui uetarijka anchikuareta, uinapekua ka tekantskua. Irekakua indengui discípulu uetarinchajka par sesi irekani eska na na Taate Jesús tsanarijak, per tatsekua no mirikuriaka indeni mindani par anchikuarentani par jatsintani ma ambakiti iretani eska na uetarijak.
Ma josku indengui erajkutajka
Seskueni xarasïndi indengui inde josku arhíjpejka: enga maru t´aresïechani tsïmangui irekajka iauani intskuajka eropekua, Herodesïni iamindu imaeri uandariechanguni, tsïmangui iamjku irekajka, p´ikuarerasïndiks chonarikua ka no sesi p´ikuarerakua. Tata Diosï sapichu jindesti indengui iauani isï jurajka par pakarantani juchari irekakuaecharu par erajkutansïni ka uinirantansïni tsipekuanguni tsïmangui jirinantajka, per sapichuesti indengui jaakuarekua intsïpejka ka chonarikua tsïmangui sesi irekakuareni jaka.
Ma josku indengui iamindu ambe tsapajka
Epifanía, jindesti exerperakua erajkukua Tata Kristueri par iaminduecha achaatiecha, per istu jindeguati k´eri ambe kuramarkuareri iaminduechaeri no ambakiti kurangukuaechari. Enga ma josku jurajka k´eri iretaechau iamindu ambe tsapaani, k´uiripu iasï anapu, mikakuasïndi kamukuaechani maruteru k´uripuechani maruteru ireta anapu, ka no uekasïndi tsïmangui jurajka iauani isï ka kakantasïndi tsïmangi no majku eratsentajka.
Achaati, Tata Diosï juchari, enga iasï aianguaka iamindu iretaechani, kangurinakua chiiti uajpaeri, eska jucha uaka chuxani imaeri xanariechani joskueri par uni untani ma parajpeni enga no jukaaka amabe kejtakukua jimangui iamindu jucha jindeguaka uachiecha.
Ka isïsti ia.