periodicociudadrealhoy

KUAMUNI JINDESTI K´AMANARHINTSÏKUA
II DOMINGO ORDINARIO


+Mons. Enrique Díaz Díaz
Obispo Auxiliar
Diócesis de San Cristóbal de Las Casas


Ima nitamakuaru, exespti Juanu el Bautista Jesúsïni, eska jurampka exeni, ka isï uandaspti: "Arhí jindesti Cordero Tata Diosïri, indenga pikurpentajka k´amanarhíntsïkua parajpeniri. Ahrí jindesti enga jí erhíjkani: ´Indenga jurhajka jindeni tatsekurini, jindesti sanderu k´eri eska jí, jimboka jarhaspti sanderu uénani eska jí´. Ji no minarikuspkani, per juraskani itsï atajpeni itsï jingoni, isï inde minarikunaaka Israelio".
Jimajkani Juanu isï uandantaspti: "Exeskani Espírituni ketsekuareni eska parakata urhapiti ka anaxurikuspti ejpuru. Ji no minarikuspkani, per imangui jindeni axaka istï atajpeni itsï jingoni uandspti: ´Ima imanguiri t´u exeaka eska anaxurikujka ejpueru Espíritu Santu, inde jindeuati indengui itsï atajpeaka Espíritu Santu jingoni´. Isï jimbo, jí exeskani ka isï uandantasïnga eska Arhí jindeska Tata Diosïri Uajpa". (Jn 1, 29-34)
Eski juchiiti iorekua
Ketsesïndi iorekua juataru isï, tsanguaraparini peñaecharu, uiriparini terujkani kauaruru ka inchasïndi iretaru. Itsïmba urapenari sontku charapernarisïndi jimboka iekuaresïndi iamindu ambenguni imangui ireta anapu k´uanikujka. Arhínasïndiks "iorekua kuchi", indeni indengui xani sesi jaxeka ka xani kanekua tsipekua intsïpejka. Eka iorejka k´aratasïndi iamindu ambe per isï xararasïndi eska sanderu sesi k´arajka, iamindu enga k´uripu k´uaniruskajka. ¿kuatara ma juriatekua iorekua xani kanekua ambaruskani ka intsïpeni tsipekua? Juchiiti iorekua jindesti eska tsïma k úiripuecha ambakitiecha tsïmangui intsïpejka uejpekuani ka sesi irekakuani, juchiti iorekua jindesti eska Jesúsï enga no erokkajka Diosï meimukua tsïmangui mentku isï kueraajka, ambakerantsïkua uparini ka puantsïperakua intsïpeparini.
Ordinario jandu
Lunesï isï nitamakata uenaskasï jandu indengui arhíkuareka ordinario, iasï jindesti ma uenani domingo eka jupinkantajkasï irekakuani mandani juriatekua par kumantani ukataechani pauani ka pauani. Nitamakuaresti ia kanguarikua ka jimbani uexurini ka iasï patamutaxaka arhí kutsïni Enero arhíkata. Ka kanekua jukaparasti par "petamutani", jimboka jucha erokantaka pauani ka pauani iamindu ambe enga ukuariaka per eropekuuanguni.
Cordero indenga p´ikurpentajka k´amanarintsïkuani
Xararakua Jesúsïri enga iasï Profeta uandajka, jindesti Cordero Tata Diosïri. Upirindi eska juchansïni no ambejtsïni arhípiringa inde uandakua, exepiringasï eska ma ambakiti eradepakua, per ireta Israelieri jukaparasti k´eri ambe ka erokaakasï eska jucha kuranguntaka ka mostakuntani xararakuani iasï anapu ka sesi ambakiti p´ikuarpeti.
K´amanarintsïkua uandijpesïndi ka kakasïndi iamindu ambe
Menchani isï jucha kristianuecha mirikurisïngaksï ambesï jindee k´amanarintsïkua. Noteruksï jucha eratentasïnga eska ma no sesi ukua, per jindesti ma ambe enga tsapajka irekakuani k´uiripueri ka uachiechaeri, kakantajka iretani ka iamindu ambe ikichakua ujka. Uetarisïngaks eska jucha jupintaka sesi eratsekuani jimboka jarasti ma ambe enga nojtsïni jurajkujka sesi irekantani ka iamindu indeni ikichakua chkuandirakua minarikusïkasï eska k´amanarintskua. Jarastiksï maru k´uripuecha tsïmangui no uekajka minarikuntani eska iamindu inde ambe no sesi ukua arhíkuaresti k´amanarintskua.
Kuamuni jindesti k´amanarhintskua
Tata Kristu jindesti Cordero Tata Diosïri indenga p´ikutpejka k´amanarhintskuani, per jucha jindeska imaeri discípuluecha ka uaetarisïngaksï uetenani ka k´eri anchikuareta par kejtatani iamindu ambe enga jindeka k´amanarhintskua ka jindesti isïku arhintsïpekua eska tsïmangui isïku uandajka, jindesti iamindu ambe enga uandijpejka, imangui iamindu ambe kakantajka, enga sïpajka, imangui no sesi ambe ujka iapuru isï. Jesúsï uekasti k´ejtatani iamindu ambe chkuandirakua parajpeniri par sesi ambe uandantani. Iasï jucha paakasï uinapekua Espíritueri par jirinantani arhí iretani santuecheri enga kueraatantaka Jesúsï. Iasï jucha p´ikuarerantaka Jesúsïni enga inchantaka juchari irekakuaru ka kuiparajka juchari k´amanarintskuaechani, kejtatajka. ¿Ambesï jucha untanni jaki par sesi ambe untani? ¿Kuamusïngaksï ka irekasïngasï k´amanarintskua jingoni? ¿Nasï jucha p´ikujki irekakuaru sesi xararakuani Jesúsïri Cordero?¿Ambesï jucha ujki pauani ka pauani?
Tata Ambakiti tunguiri juchansïni ioarejka sesi irekantani ka Jesúsï jingoni t´ujtsïni intsïkujka amabkiti Corderoni indenga p´ikurpentajka k´amanarintsku, intsïkujtsïni ambakiti mitekuani par eratentani ambakiti ambeni ka uinapekuani par jarhani anaxuririni sesi ambe untani, ambakiti ka sesekuani indenga juchansïni jaruatajka par sesi irekakuani ka iretani. Ka isïsti ia.