periodicociudadrealhoy

Mostakauantani espadaechani tarerakuaeha jimboni.
I Domigo de adviento.

+Mons. Enrique Díaz Díaz
Obispo Auxiliar
Diócesis de San Cristóbal de Las Casas


Eki Tata Diosïri uajpa junguaka, isï ukuarentaati eska nitamakuaru eki Noé irekapka. Tsïma juriatekuaecharu eki xani janipiringa, iamindu k´uiripuecha kanekua t´iresïramptiks, kanekua itsïmasïramptiks ka tembuchasïramptiks, achaatiecha ka uariitiecha, juriata jamberi eka Noé inchantaaka Arcaaru. Ka no mitesïramptiks eka janopka kanekua janikua jamberi ka iaminduechani pakuariaspti. Istu ukuariati eka Tata Diosïri uajpa junguaka. Jimajkani, tsïmani achaatiecha tsïmangui majku jauaka, majkusï erakuaati, ka materu no. Tsïmajkani uaritiechari tsïmangui majku jauaka, majkusï erakuaati, ka materu no.
Jimbosï, tsïnarikata jaue, jimboka noksï miteska kani jugua Achaati. Sesi exekuare: eka ma ktaeri jatsiri mitepiringa naki jandu niara kuarujjperi sïpajpeni, tsinaritini jaguati par no kasïkuareni eska sïpaakasï k´umanchikuaru. Jimbosï, tsinarikata jague; jimboka Tata Diosïri uajpa junguati eka noksï jandu eratseaka. (San Mateo 24, 37-44)
K´eri ambe no sesi ukua.
Echeri p´amenchaxati. Echeri uarinchaxati. Isï exentasïndi uaruri Tabasqueño indegui exejka nasï k´eri japonda antaka playani ka nasï pakuarenta terujkani palapa. Mitentaxati k´uiripu P´urhepecha indegui exentajka japondani P´askuaru anapu mandani juriatekua sanderkuekia ka mitekuarentajka eska tsïmaeri sapichuecha utasïterku kurandiaka ia ka miatsïkkuaecha jimbo minarikuakasï achojkini ka sontku isï ukuariati kurucha urápitinguni. Isïksï no sesi exentaxasti juchari iretaecha jimboka jorhepekia exeherieri mostakuarexati, kanekua janikuanguni eska uenani no exekuarimpka, k´eri k´aridekua ka uanekua ambe indengui no sesi ujka iapuru isï. Echeri p´amenchaxati. Milecha ka milecha tonelada inderi basura ka uanekua tóxicoecha tsïmangui no ambakeka indengui iapuri isï jaka tsïtakata iretaecharu. Anatapuecha juataechaeri kuaskuanaxatiks, p´iskunaxatiks iamindu ambe echerieri. Echeri p´amenchaxati ka ¿jucha ambeksï uxaki? Eska najtsini arhijka evangelio iasï anapu: "T´iresïramptiks ka itsïmasïramptiks no jaakuareparini" Iaminduecha uandontskuaresïngaks ka uandasïngaks, per ¡istku irekanasïndi!
Mostakuaparini kanarikuani.
Ma uenani domingo advientueri jindesti ma k´eri jiguakkuarekua indengui jirinajka tsïnaritansïni ka iorentansïni par exentani ambeksïs uni jaki juchari irekakua jimgoni, echerierijingoni ka k´uiripu jingoni. K´uiripu, ukata eska Tata Diosï, jjindesti sanderu k´eri no sesi urï ixu echerindueri anapu. Isaiasï exeparini no sesi nitamakuarikua, no uekasïndi eratsentani eska k´amarakkua janoxaka ka axasïndi jiguakuarikua eropekuaeri kurajkuareparini ka tsanariparini eska "Espadaecheri ukuarentatiks tarerakuaecha ka k´uanirakuaecheri, p´ikurakuaecha" Uandakuarekua, eska mostakuareakasï políticaecha ka uanekua ka ambe uekakuaecha k´uripuechaeri.
Jatsintani ambakiti kanarikua achaatieri
Iamindu ambe indengui ukuarentani jaka iapuru isï, uandikuxati iamindu ambeni jandiojku. Uetarisïndi eska achaati sesi ambe untaaka. Niguakaksï sïranguaru jamberi k´uiripueri par medneru jimbani untani, par sesi irekantani. No mane uekasïndi eska na irekakuarentani jucha jaka, iamnidu ambe k´amanarintskuaechanguni ka xepekuanguni. Tata San Pablu p´imarintasïndijtsïni par "sesi irekakuarentani" ka uandantasïndi p´amenchakua mintsitaeri: t´irenchakua, kauikua, uaripekuaecha ka ambe no sesi uekakuaecha.
Espadaecha tarerakuaecha jimbo
Uetarisïndi untani eska na Isaíasï uandajka ka nojku mostakuantani espadaechani tarerakuaechani jimbo ka lanzaechani p´ikurantsïkuecha jimbo, uetarisïndi jurarkuni iamindu tsïma uandijperakuechani ka iamindu ambe na ambakiti.
Jandu eropekuaeri
Advientustu jindesti jandu par aiankpeni, jindesti ma jandu eropekuaeri ka ambakiti janasïkakuaeri. Anchikuareta discípulueri jindeuati irekani eropekuanguni ka tsinaritpeni eropekuani. Tsinarikuarie, jindestiks uandakuaecha Jesúsïri tsïmaeri discípuluechani. Isï uandasïndi eska ukuareaka eska na nitamakuarepka eski xani janipka. No mane jakajkusïramptiks, no mane erosïramptiks, eka Noe eianguapka. Iasï iapuru isï exekuaresïndi no sesi ukuaecha: tsïnchexatiks ambakiti p´indekuaecha, tsïnchexati uachikuaecha ka tsïnchesïndi irekakua.
Taate ambakiti, isï eska mentku isï jimbani untajkari mintsitani k´uiripueri, intskujtsini arhí jandu Advientueri sesi uakaksï, iapuru isï ka mentku isï ka iaminduechanguni, par isï erokani janongakuani Tata Diosïri uajpa Jesúsïni. Ka isïsti ia.