periodicociudadrealhoy

Tata Diosïri eskuaecha jingoni.
XXIX Domingo Ordinario



+Mons. Enrique Díaz Díaz
Obispo Auxiliar
Diócesis de San Cristóbal de Las Casas


Ima nitamakuaru, para jorhendaani discípuluechani uetarisïndi mentku isï uandatsekuarini ka no kuataraparini, Jesúsï arhiaspti arhí parabolani:
"Ma iretaaru jaraspti ka kéri juramuti imangui no chereampka Tata Diosïni ka ni jananariampka achaatiechani. Irekasïrampti ima majkani iretaaru ma tsindi imangui niraampka mentku isï arhíntani: ´Uchirini sesekua juchiiti materu isï eratseti´.
Iontki isï, ima juramuti no kurajchaspti, ka tatsekua arhispti: ´No arhiparini eskani Tata Diosïni no cherejkani ka ni achaatiechani jananariajakni, isï, arhí uariiti tsïndi jimbo, ukuakani sesekua ka isï noteru junguaka´".
Isï arhiárini, Jesúsï uandaspti: "K´o isï eratsesïrampti juramuti no sesi urhí, ¿ Cha jakajkusïni eski Tata Diosï no sesekua ukuauaka imaeri erakuakataechani, tsïmangui kurakujka juriatekua ka churekua, ka isï jaguakasï erokani? Ji arhisïngaksïni eska ukuauaka sesekua sontku. Peru eki juguaka Tata Diosïri uajpa, ¿Cha jakajkusïni eska exentaaka jakajkukua echerinduuru?" (Lc 18, 1-8).
Sesi jaxekua inchanekuaeri
Chiapas kanekua sesi jaxesti inchanekua ka uerakua isï. Ma nitamakuaru maru k´uiripuecha nirasptiks eranani ma cuevaru. Sanititku xanaraspti ichaparini, chuererkua, kustakua ka p´untsumekua no sesi jamarakua chuantaspti maruechani. Marujkuecha inchasptiks sanderu. Ka jaraspti ma sani cherekua: no usïramptiks sesi ambe exeni ka isï kuraakuaresïrampti eski iorekua. Ka tasekua eki nitamakuarepka chonarikua ka no jakajkukua, sontkuksï p´indenarisptiks cheurekua exeni ka xanarasptiks sanderu inchakuaru. Sesi jasï iorekua tutsekata exentasptiks sesi jarati itsï uekorekua tsakkapuecharu isï ioresïramptiks. "Kanekua ambe jukaparasti eskantani maruteru eskuaechani jimbo, sesi isïsti para p´indekuareni ambe materu exentani. K´eri ambe jindeesti exentani inchanekuaru juataru isï. Pero uetarisïndi tekaakuarentani ka exekuarentani para sanderu jini nirani orepani isï", uandantasïramptiks tsïmangui inchapkasï.
Eskani Tata Diosïri eskuaechani jimbo
Eki eratsentaakaks juchaari uandatsekuaru eska ma santuarueka jiningui jucha uaka uinapekuarentani, jiningui untajkaksï p´inaskua exentani, jinigui jucha uaaka exekuarentani Tata Diosï jingoni, exentaakaks eska jindeesti ma ukua imangui jucha ujka jatsikuareni, ma k´eri ambe jindeesti. Ma k´eri janaskati uandasïrampti eska uandatsekuarekua jindeska animaeri sïpirukua, ka no uakaks kuranguntani andisï isï p´ikuarerakuarejki. Para uandatsekuareni uetarisïndi jandiojku jarhani ka p´ikuarerakuareni eska Tata Diosï jingoni jaraskaks. Ka eratentani: jimbosï uetaristi: tekaantani, jatsikuntani jukaparakuani ka exekuarentani Tata Diosï jingoni.
Ma tsïndi: jorhentpiri uandatsekuaeri
K´amambatserasïngani eki Jesúsï isï arhijka Tata Diosïni eska isï jindeska eska ma k´eri juramuti no ambakiti, eska no sesi kurajchajka imani tsindini, eski kanekua uandatsekuarejka mentku isï. No mane eska ima tsindi para kurajkuareni sesekua: no jatsiparini uachekuani, no ambe uandaparini, p´ikuparini no sese kanakuani ka ni sesi exenakuaeri. Peru imaeri jakajkukua ka tekaantsekua uspti eska ima no ambakiti juramuti kurajchapiringa. K´eri ambe jorentpekua jindesti para mandani jucha, jimboki istu no sei ukuarexaka ixu juchaari iretaaru iasï jamberi.
Sanderu jini eska uandatsekuaru: sesekua ka jakajkukua
Iasï anapu parabola exerajpesïndi eska ma uenatini iretaecha tsïmangui tsimajkani menderu erokantaampka Jesukristuni. Pero isï exerajpesïndi eska iasï jamberi na ukuareni jaka iapuru isï no sesi k´uiripu ujka ka no sesi ukuajka tsïmaechani tsïmangui no ambe jatsika. Jiguakuarekua tsïndieri kuraakuaresïndi iapuru isï juriakua ka chuerekua, jindesti uandatsekua saichueri imangui no ambe jatsikuareka ka kurakuajka Tata Diosïni eska intskuaka sesekua para isï irekani. Ima tsindi no isïku pakarantasïndi: imaeri uandatsekua jakajkukua jatsisti ka nomeni kuarantasïndi. Uandatsekua usïndi eska exentaakaks iapuru isï Tata Diosïni mentku isï.
Taate uembekuaeri, tunguiri exejka uejpekua jingoni koma jakua mandani juchaari chiiti uajpaecha, jatsijkuntasïngaksïni chiiti jajkiecharu iamindu juchaari eropekuani ka iamindu juchaari uembekuani, paraki uinapekata juchaari jakajkukua, kuntandaakaks juchari uandatsekuani uinapekua sesekua jimbo ixu juchaari k´eri iretaru. Ka isïsti ia..