XV DOMINGO ORDINARIO
+Mons. Enrique Diaz Diaz Obispo Auxiliar
"Ti k'e tek'ana jun je'aju'un, k'ana oj sk'ul probar ja Jesusi. Ti yala: Mayestro, jasunk'a t'ilan oj jk'uluk b'a oj jta'e ja jlekilali. Ja Jesusi ti yala yab'a: jasunk'a wa xak'umani ja b'a sju'unil ja Moysesi. Ti yala'a: Yajtaxa ja Kajwaltik Dyos sok spetzanil ja wawaltzili, sok spetzanil ja wak'ujoli, sok spetzanil ja wawipi, sok spetzanil ja wapensari. Yajta ja wamoji ja' jastal wa xayajta ab'aj ja we'ni.
Ti yala'a: jel lek jawalata. K'ulan ja iti oj ata' asak'anili. Ja ye'na wa sk'ana oj skolta sb'aj. Ti yala'a: machunk'a ja jmoji. Ja Jesusi ti och yala:
< Jun winik ja b'a Jerusalén ti ko'a ja b'a Jericó. Ti mok' b'a yoj snalan ja elkanumi. Ti sopowe' yi'a ja sk'u'i, ti sjasawe' te'a. Ti elye'a. Ti ya'awe' kan chamel sak'ana. Ti cho ko'a ja b'a b'ej jawi jun pagre. Ti cha yila'a, ti sjoyb'an. Jach'ni jun talna snajtzil Dyos, ja sb'i'il ja schol Lebita. Ti cha ek' ja b'a luwar jawi, ti cha yila'a. Ti sjoyb'ana. Ti cha ek'a ja b'a luwar jawi jun swinkil Samarya, ti cha yila'a, ti stalna sya'julab'ila, ti smojo'a, ti spotzo yi'a ja syajb'eli, ti ya'a och asete sok trago, ti ya'a k'e'uka ja b'a skawu, ti yi'aj ocha ja b'a jun jijlub', ti stalna'a. Ja yajni sakb'i ja k'inali ti ya'a el t'unuk tak'in. Ti ya'a yi' ja swinkil ja jijlub'i. Ti yala yab'i: Talna lek, ta ayto wa sk'ana oj tup awi' ja yajni lakumxiyoni. Ti oj jtup awi'a.
< Machunk'a ja oxwane' iti ja ma' ya'a sb'aji lajan sok smoj ja ma' mok'i ja b'a yoj snalan ja elkanumi. Ti yala'a: ja ma' stalna ja sya'julab'ili. Ti yala ja Jesusi: ka'ax, k'ulan jach'uk ja we'n chomajkili" Lucas 10, 25-37
Ja yal violin cha'tike yak'il
< Ch'ayaltikta kani ja ke'ntiki ja b'a snalan b'ej wa x'a'aji oj jk'u'uktik jel ja stz'okob'i ja ma' wa slika ja ixuk winik jumasa'i, ja'xa wa xcholo jb'ajtik ja b'a chikan jas ckoltik ja ma' wa sjomoyotiki: ja tak'ini, ja ipali, chikan jas mandar. Jel jitzan jitzan ja jt'ilantiki b'a junxta jk'ujoltiki,. Pe' mi t'ilanuk kujtik jitzan mandari b'a junxta ja jk'ujoltiki, malan ja leman syajtaneli. Sok ja syajtaneli lajan lajan ajyukotik sok ja jnantik K'inal, lajan sok ja Jesusi, ja smeranil yoyali (Colosenses 1,15-20), jastal wa xyala kab'tik ja yal xetan ju'un ja ya'an k'ak'u. Sok ja syajtaneli junxta oj b'ejyukotik sok ja kala mojtik jumasa'i, jastal wa sje'a ki'tik ja Jesusi ja b'a tzamal slo'ili ja slekil swinkil Samarya ja yajni ja kaltziltik wa snocho pilan kistalbesjel ti xkan ch'ayel ja'xa wa sjomo ja slamlamili. Ja slo'ili ya'unej ki'tik yuj ja Jesusi wa xya'a oj jk'eltik ja b'ejlal jawi ja ma' wa smochowotik ja'xa wa xya'a ki'tik ja jwokoltiki. Ja winik jawi ti kan chamel sak'ana ti b'a snalan b'ej, sta'a ja swokoli yuj ja tuktukil winik ja ma' wa stzajlaye ja tuktukil sb'ejlal. B'a oj sopxuk, sjaxaxuk te'a, oj makxuk, ja'xa b'a oj a'axuk kani b'a'an ja kala jmojtik jel t'ilan jun kistal altzilal, jun ka'el sk'ujol. Ja'xa wa xta'axi k'e'e: ja k'ak'aneli, ja yelk'anjel ja ixuk winik jumasa'i, ja chonodroga, ja kistalbesjel, mi kechanuk wa sje'a ki'tik chab'oxe sk'ulajeli, ta mi k'a jastal mochan aye ja kaltziltiki.. Ja yajni ja yok'el jk'ujoltik wa smono ja jcholtiki, wa xb'ob' oj jiptik kani ja kala mojtik jumasa' ja'xa oj jnutztik ele ja b'a kaltziltik ja jnantik K'inal, wa xb'ob' oj jomtik ja'xa oj ki'tik jani ja yentoril ja jastikili anima oj chamuke wa'in ja yentoril ixuk winike'i. Cha jach'ni ja ya'an k'ak'u jel ja ixuk winike'i, mey ja sb'i'ilali, wane chamel wa'in, ti kan b'a'an ja b'a snalan b'ej, yuj ja sb'ejlal ja jnolantiki kechan wa sle'a ja stak'ini sok ja yok'el sk'ujol, mi yocheluk ja ye'na ja syajtaneli.
Ti sjoyb'ana ek'a
< Jitzan jitzan majke wa xb'ob' "oj ko'tik ja b'a junxta sb'ej ja kala mojtik" lajan sok ja pagre sok ja Lebita jawi, pe' wa xjoyb'antik, yuj ja wa xle'a ja jlekilaltiki, chikan lek yuj ja celebracyontiki ma ja jk'umaltik, pe' mi yocheluktik ja slekil ja ixuk winike'i. Ja ma' mi syajta ma mi xyila ja smoji, mi sk'u'an meran ja Jwawtiki. Ja judyo jumasa' wa xyilawe' jastal ja smoj jumasa' ja swinkil ja schonab'il, pe mi smojuk, schi'ye, ja ma' mi judyo'uke, anima wan wokolanel b'a'an. Ja Jesusi mi lajanuk sok ja'xa wa sk'omo ja sb'ejlalil jawi. Mi xb'ob' oj makunikotik yuj ja Jwawtiki ja'xa oj joyb'antik ek'e ti b'a sti' sat ja ma' ay swokoli. Ja sk'umajel ja Jwawtiki ta mi yocheluk ja smoj jumasa' wa sjomo ja smandar ja Kajwaltiki Dyos, ja'xa wa smono lom ja ixuk winik jumasa'i. Mi xb'ob' oj sta' junta jk'ujoltik ta mi syajta ja kala mojtik jumasa', anima oj kaltik wa syajta ja Jwawtiki. Ta mi xmojta ja tuktukil ixuk winik lajan ja jmoj'ajeltiki, ja kala b'ejtik sok ja choltiki, ja'xa ja ka'ateltiki, jel najat juntiro ja b'a schol sok ja sak'anili ja Jesusi.
Ja yal swinkil ja jijlub'i mito xyab'i mach'unkila ja smoji, wa stalna, wa syajna ja sya'julab' jawi, pe' yuj ja stz'akoli. Wa syajna ja sk'ujoli lajan sok ja ke'ntiki, pe' wa xyila ja stz'akol oj ta'xuk ja'ni. Jach'ni wa xta'a jb'ajtik , wa xkoltatik ja tuktukil jmojtik pe' yuj ja wa xk'ana oj jta' la lekil jlekilaltiki. Ja swokol , ja swa'ni ja ma' mi jas yi'oje'i, ja'ni ja sjijlub'i ja ma' wa sle'a ja lekil slekilali, ja yok'el sk'ujoli. Ja b'a Jesusi ja ma' mi sna'a sb'aj ja yaltzilal ja Jesusi, jastal wa xyalawe' ja tojol judyo jumasa', ja swinkil Samarya, ja'ni wa scholo sb'aj sok ja sb'okan ja Jesusi, b'a wa xjijli ja smeranil sak'anili. Mi x'alji yuj ja Jwawtiki pe' wa xchijk'aji yuj ja scholi: ti stalna, ti smoje'a, ti spotzo yi'a ja syajb'eli. Mi x'a'awani pe chab'an wa sya'telta ja ma' wan wokolanel. La'xa oj jmojtik ja Jesusi ja'xa oj kaltik yab'i ja jas sb'okan wa xjijli ja jsak'aniltiki. Jasunk'a wa xyala kab'itik ja jk'ujoltiki ja sb'ej ja slo'il ja Jesusi. Jasunk'a wa xjak'atik yi' ja yajni wa sk'omowotik yuj ja jcholtiki sok ja kala mojtik jumasa'i. Jas b'ej wa xle'atik ja yajni wa xjoyb'ajtik ti b'a sti' sat ja kala b'a'an jmojtik jumasa'i. Jasunk'a wa xkalatik yab'i ja Jesusi.
No hay comentarios:
Publicar un comentario