Lengua Indigena

¿Nani jarhaskini?
Mons. Enrique Díaz Díaz
Obispo Auxiliar Diócesis de San Cristóbal de Las Casas, Chiapas.




Ima nitamakuaru, Jesúsï xarharakuaspti discípuluechani ka isï arhiaspti: "Karakata jarhasti eski Mesíasï no sesi ukuarenchapiringa ka tsintapiringa tanimu jurhiatekuaaru, ka ima jimbo iamindu iretaechani jorhendanapiringa, uetenaparini Jerusaleninguni, uetarisïndi k´uanatsentani Tata Diosï jingoni paraki puatspenantaaka k´amanarintskuaechani. Cha isï exexaka. Iasï ji axachiakaksïni imangui juchiiti Taate chansïni eiacheka. Isïku je, iretaru, eki cha jamberi uinapekuani p´inkuntaaka auandaru anapu.
Tatsekua uentaspti tsïmaechanguni iretaru ueramani, jimajku Betania isï; jajki tarhataaparini, ujchakuraspti ka eki ujchakurani japka, nintaspti auandaru. Tsimaecha, tatsekua ekiks uandatsekuarekupka, kanekua tsipekuanguni, ka mentkuks isï jarhasïrampti tata Diosïo uandatsekuarekuni. (Lc 24, 46-53)
K´urhanguarekua Uenani ji isï erhatsesïrampka eski chanxapka o tontu ukuareni: ma tumbi jindespti isïku jandi. Xanarhasïrampti Diosïo, iamindu k´uiripuechani exeaparini, uentasïrampti ka menderu inchantasïrampti ka menderu istku usïrampti. Kokani uanekua k´uiriuecha no sesiks exesïrampti ka maru k´uramarisïrampti andisï isï uambi. Repentku, eki misa arhinani japka, uinani kuraakuarespti: "¡Tsïnchetini jarhaska! ¡Arhiejtsini nanisïni jaki! ¡Nani jarhaskini!" Mane arhispti eski isïku japiringa, maruteruecha andarherasptiks, ka ima sanderu uinani jiuakuaresïrampti: ! ¡Nani jarhaskini!, jimajkani uentaspti Diosïo. Eki Misa k´amarapka, k´uiripu uandatsesïrampti, eski p´amenchasïrampka, eski ejpu no sesi jatsispka ka maruteru isïku uadakuaecha…, noksï mitesïrampti ambesï tubi ukuarenchapi. Tata Fermíni, sesi uadaparini, isï arhispti: "Isï jindesti eski juchari erhatsekua isï juchansïni uandajpapiringa ka k´uramaripiringa: "¡¿Nani jarhaskini?!" ka isïku jucha pakarantaspka erhatseparini.
"¿Nani jarhaskini?"
Juchari sesi irekakua k´exati mentku isï, ka no exentasïndi tsipekuani. K´arhastia iapuru isï, tsapastia iamindu kuskakuaechani, patsantasïndi kuraakuarekuaechani ka k´ejkuantasïndi eranarikuaechani, urhasïndi iamindu ambe, ka no sesi p´ikuarerasïndi, jimboki isïku irekaxaka ka jaakuarentaparini ambesï jugua. Parhajpeni uarimexati jimboki kéjtataska Tata Diosïni ka mojtakuska tumina jatsikua jjimbo ka utasï no usïndi iamindu uiniarani. Tsïtastia kutukua indengui kuturantaaka auanda echeringuni ka jimbosï tsïnchetini jati. Iasï k´uinchixaka Tata Kristueri kénchintskua, jindesti ma k´uinchikua, sesi kuranguparini ka sesi irekaparini, intskuati sesekua juchari irekakuaechani, kuturantasïndi auandani echeringuni, uinaperansïndi juchari xanarhakuani ka erandukusïndijtsini juchari irekakuani. Kénchintskua jindesti Diosïri andapekua k´uiripeta ukata indengui p´ikuantajka iamindu no sesi p´ikuarerakuaechani ka intsantani irekakua. Kénchintskua jindesti mokukua indengui juchansïni arhiaka: "¿Nani jarhaskini? Exeparini Jesúsïni exentaakaks xanarhini indengui nirajka echeriiru isï ka auandaru niantani.
Kénchintskua k´amarakkua ka uetenakua
San Lucasï iasï intskusïndijtsini ma sesi uandakuani: k´amarutasïndi imaeri Evangelioni kénchitskuanguni pero uetenasïndi materu uandaku, "Apóstolecheri ukataecha", istu ukata. Ma ueanani uandakua arijpesïndi nanisï Jesúsï nirajki. Kénchintskua jindesti k´amarantskua andapekua irekakua ixu echerindu Jesúsïri ka k´amarakua imaeri ukua; ka jindesti uetenakuarekua "jandu Iglesiaeri", ueetenatini Espíritu Santo jimbo, eiantspekata Jesúsï jimbo.Tsimani jakuaecha Jesúsïri jirinakuaru Tata Diosïri irekakuani: ma jakua exekakua ka materu no exekakua, iamaecheri discípuluecharu. Eki ireta jakajkuti p´irajka Espírituni uekasïndi mentku isï uini eski na Jesúsï uetenaka, intspeni Taateri Irekakua. Ukua indengui uetenakuarejka intskuparini sesi irekakua iretani jimboki uetarisïndi eski jorhentpeakaks "iamindu iretaechani uetarinchakua kuanatsentani Tata Diosï jingoni ka isï puachintaakajtsini juchari k´amarhintskuaechani". Isï jindesti intskuntani jurimbekua xanarakuarerini: niantaaka Diosïo; jindesti ma tsintskua uinapekuaeri: Jindesti Espíritu Santo, "uinapekua auandaru anapu", ka iamindu uetenaparini irekakuaeri echerindu k´amanarintskuaeri ka no ambe jatsikuaeri.
Exentaparini xanaruni
Imangui no jatsika jupitakuarekua, tsinchexindi, ka isï pakarhasïndi tiripakuarerini. Jarhasti imangui auanda ka Tata Diosïri irekakua no ambe arhijka; solujku tuminani eratsesïndi, uninapekua, jatsikuani, chanakua ka tsijpekua tsipekuani. Iamindu ambe imangui ima uekajka ixu anapuesti echerindueri. Maruteruecha noks mitesti namangui ixu irekanani jaka, mirikurisïndiks p´amerekuaeri ka kom jakua uachiecheri ka jatsisïndiks aundani eski majku k´eri ambe. Isï xarharasïndiks maru jakajkukuaecha tsimangui jandiojkuks uekakjka anchikuareni ka intsïnbenasïndiks tumina ka isï uekani puantskua andanguni. Tsïma isïkuks pakarasïndi, eki k´uiripu anchikuarejka para sesi irekakuani andanguni. Iasï Kristu intsïkusïndijtsini materu irekakua: arhisïndijtsini eski jarhoajpekuanguni eropekuaeri untaakaks auandani ixuenatini, echerinduuru, uejpekuanguni, anchikuarikuanguni ka jatsirpekuanguni juchaari uachiechani. No uekasïndi Jesúsï discípuluechani "anaxuririni exeparini auandaru" , no uekasïndi k´uiripuni isïku janndi, no uekasïndi discípuluechani xepitiechani tsïmangui no uekaaka ambe ma uni. No jindeestiks chuxatiecha Jesúsïri tsimangui ikichakuen irekajka. Isï achaati tsïjpesïndi. Intspekua Jesúsïri eski kerigma indengui intsaajka discípuluechani: p´amerekuaeri ka uarikuaeri niarantani tsintskuaru. Ixu uentania excherinduru ka niantania auandaru. Chuxantani xanarini imanguni imangui k´uiripeta ukuarentaka ka achaatiechanguni irekaka para paantani irekakuaru mentku isï, indengui exenajka iasï jamberi. Arhí parajpeni majkuesti xanari indengui juchansïni pantaaka auandaru ka isï exerantastijtsini Jesúsï. Jindeakaks, uratiecha eropekuaeri ka urpetiecha tsanarikuaecheri tsimangui k´uiripeta ukuarentaaka juchari irekakuaru.
Ahrí k´uinchikuaru kénchintskuaeri jucha mokutspeakaks uanekua k´uranguarekuaechani tsïmangui juchansïni jarhoataka jirinantani xanariecha kuntpekuaeri ka enchikuarekuaeri: ¿Na jindeskini ma discípulu Jesúsïri indengui exerpeaka sesi irekakua indengui ukauariaka ixuenatini echerinduru? ¿Minarikusïkini ka uekasïni xanari indengui Jesúsï juchansïni jorendaka? ¿Jindeskini ambakiti uandakua pári ka uandantasïni eropekua tsïmangui no sesi p´ikuarerani jaka? ¿ Nasï exenajki eski ji jindeekani discípulu Jesúsïri?
Diosï, ambakiti Taate, iasï tsipentaxaka sesi irekakua jimbo Kristo Jesúsïri. Exerantasïni eski jaraska ma auanda, intsku ambakiti eskuaechani juchari mintsitani paraki kuranguntaakaks naki jindeski imangui t´ujtsïni ioareni jaka. Uinaperantaa juchari xanatakuaechani, juristakuanta paraki untaakaks anchikuareta ma párankpeniri eski chiti mintsita ka eianguantani iaminduecha k´uiripuni Sesi Irekakuani chiiti uejpekuaeri ka chiiti puantskua andangukua. Ka isïsti ia.