Lengua Indigena

Ma janasïkakua no minarikukata


IV Domimbu kuaresmaeri. +Mons. Enrique Díaz Díaz. Obis. Aux. Diócesis de San Cristóbal de Las Casas, Chis. Traduccion en: P´urhepecha?
Traductor: NicolásJimajkani nitamakuaru, andereerasptiks Jesúsïni publicanuecha ka k´amanariatskua úrhiecha para kurajchani. Jimbosï fariseoecha ka escribaecha isï uandasïramptiks: "arhi eroasïndi k'amanarintskua urhiechani ka t'iresïndi tsïmaechanguni". Jesúsï isï arhiaspti: "Ma achaati jatsiaspti tsimani uajpaechani, ka imangui sánderu sapichuepka arhispti taatembani: "Taate, intskurini juchiiti herencia", ka ima arukukuaspti ka intsaspti. No uanekua jurhiatekuecha tatsekua, uajpa sanderu sapichu, tarhatakuariantaspti iamindu ambe, nirhaspti, materu k'eri irétaru ka jini ambe tsïjpaaspti tuminani, no sesi úraparini. Tatsekua eki noteru ambe jatsipka, uenaspti k'aringuarini ka k'arimakuareni ka undaspti ma ambe uetarinchani. Jimajkani niraspti anchekuareta kurakuni ma k'uiripuni jinianatini irekatini, ima axaspti kuchiechani exeani. Jimboki xani k´arimaamka uekasïrampti arháni t'irekua imangui kuchiecha pakamuamka, pero noksï kajtasïrampti eski t´irentapiringa.
Jimajkani eratsentaspti ka jandiojku uandaspti: "¡Namuni anchikuaririecha juchiiti Táateri k'umanchikuaru jatsiskiks kanekua t'irekua, ka ji, ixú, uarixaka k'arimaparini! Jaguarakuariakani, k'uanatsentaakani juchiiti taatenguni ka arhiakani: Taate, k'amanarintskua uskani auandaaru ka t'ungueni jingoni, notaruni jindeeuaka ia chiiiti uajpa. P'íkuntarini eski ma chiiti anchikuareri". Jimajkani ueentaspti xanarakuareni para taatemberi k'umanchikuaru niantani.
Jarhaspti utasï iauáni, eki taatemba exepka ka sesi píkuarenespti uajpani exeparini, uiriaspti kumantani, kamajchakuntaspti, ka iamindu putirentaspti. Tataka arhispti: "Taate, k'amanarintskua uskani auandaaru ka t'ungueni jingoni; notaruni jindeeuaka ia chiiti uajpa". Pero Taatemba arhiaspti jaruajpetiechani: ¡kokani!. Juachuejtsini xukuparakua sanderu sesi jasï ka jatsikuntae; jatsikunte ma anillu ka jukandurakuechani jatsikuantee jantsiriecharu; juachiejtsïni uacasï p'ukuri ka uándikue. Jue t'ireni ka uaakaksï ma k'uinchikua, jimboki arhí juchiiti uatsï uariri jaraspti ka tsintasti, tsinchentaspti ka exentaskaks. Ka uenakuarespti k'uinchekua.
Uajpa imangui sanderu k'eriipka andhikuarexapti juátaaru, ka eki niantani japka k'umanchikuaru, kuraaspti kustakua ka pirekuaechani. Jimajkani iuárespti ma jaruajpetini ka k'uramarispti ambesï úkuareni japki. Arhí mokukuntaspti: "Chiiti mime janonguasti ka chiiti Taate uándikusti uakasï p'ukuri jimboki sesi kuntasti". Mime sanderu k'eri bien ikuaspti ka no uekasïranpti k'umanchikuaru inchantani. Jimajkani uéraspti Taatemba ka komarhispti eski inchantapiringa; ka ima mokukuntaspti: "¡jikeni maruachixaka iontski isï, ka nokeni men jurajkusïnga, ka t'u norini men intskusïnga ma k'arichini para ántani juchiiti pantpiriichanguni! Ka iasï k'o, junguasïndi inde chiiti uatsï, indengui iamindu tumina ikichakua úka no ambarhati uariechanguini, ka t'u uandikusïngari uakasï p'ukurini".
Taatemba arhíspti: Uatsï, t'u mentkuri jindeenguni jaraxaka ka iamindu ambe juchietika chiitiesti. Pero uetarisïrampti k'uinchikua untani, jimboki arhi chiiti mime uariri jaraspti ka tsipentasti, tsïnchekata jarhaspti ka kuntaskaks. (Lc 15, 1-3, 11-32).
Ma janasïkakua no minarikukata.
Karakata indenguiks arhijka prodigo uajpa, indengui xani sesi mitekuarika ka uandontskuarinaka, xani sesi jorhenguarekuajtsïni Jesúsï intskujka tata Diosïri uejpekuambu eski ma Taate p'amondakuareri indengui erontajka uajpani kanekua tsipekuanguni, indengui xani jirinantaampka.
Eski na arhintajka San Lucasï, jimajkani fariseuecha ka escribaecha no sesi exesïramptiks jimboki no ambakiti kuiripuecha andareerasïramptiks Jesúsïni. Ka Jesúsïri maruakua no sesi exenasïndi: t'iresïndi, irekasïndi, xanarasïndi ka jaakuarentasïndi no ambarati k'uiripuechanguni. No ma ne ambe arhíati, para andareerani arhiasïndi eski pamonguariakaks ka jurajkuakaks no sesi irekakuani, ka Jesúsï mentku isï erhopesïndi: tsïmaechanguni irekasïndi notki pamonguaripani ka para mokukuantani arhíni k'erati no sesi uandakuaechani, Jesúsï arijpesïndi arhí uandakuani sesi xasï. Jindesti k´uiripueri mentku isï irekakua ka mandani k'uiripueri, jindésti Diosïri karakata ka Jesúsï eiankpesïndi, jindesti jimbani janaskakua Diosïri indengui achaatiechani intsaajka: k'eri ambe uejpekua, indengui mentku isï achaatiechani jirinantauaka eski ma uajpani, indengui no meni mintsïtani mikantaaka. Inde jindeesti janasïkakua indengui escribaecha ka fariseuecha noksï minarikuka, ka pedeki juchajtu noksï minarikujka: Ma Diosï indengui k'eri ambe uejpekua jukaraka, indengui puantspekua intspejka ka k'uiripuni indengui no sisi irekajka iamindu tsipekua intskujka.
Jurajkuni Taatemberi k'umanchikua.
No jakajkukuaresïndi, isï jindeesti: jatsiparini iamindu ambe ka no uekaparini ambe intspeni, sapi uajpa jurarkusïndi taatemberï k'umanchikua. Jimbosï paraisuru, chutantanasti: uekaparini jindeeni eski Tata Diosï. K'uiripu uekasïndi irekakuareni. ¿Libertad arhikata jindeski? Kokani tumbi mitesïndi eski t'aresïecha mentku isï irekatiecha onaxingaks. Mentku isï uekaxapti eski intsïmbenapiringa herencia arhikata. ¿No uekasïrampti k'umanchikuani jurajkuni? ¿No kuatarasptia eski Taatemba mentku isï exepiringa? Jotakuaresïndi herenciambu ka ikichakuen irekasïndi "jandiojku", iamindu ambe indengui uachicheripka tsïjpasïndi. Imaeri mintsita mikuaresïndi jimboki no usïndi kuranguntani eski sesi irekakuaesti eki iaminduecha andarenajka ma ambe. Eski uajpa sapichu, judioecheri p'indekua uandasïandi eski sandititku intsimbenapiringa ka eki taátemba uarípiringa ia. Isï jamaparini istkusti eski taatemba uarinchapiringa.
Jorendasïndijtsini namangui tatsekua ukuarejka: ikichakua irekakua. Mentku isï irekakuecha ukuarenaxati: jatsïni ambe, piani ambe ka tsipekuareni. Iasï isï irekanaxati. Achaati indengui tata Diosïni jurajkujka, imaeri taatembani, indengui k'umanchikuani jurajkujka, ka tata Diosïni uarinchajka ka uekani mentku isï irekani ikichakuaru herencia jingoni, isïku etsakunasïndi iamindu ambe. Kokani no sesi p'ikuarerati, no ma ambe jatsiparini, k'arimaparin ka no sesi ukua jatsiparini. Para ma Judio jindiespti no sesi p'ikuarerakua kuchiechani intskuani t'irekua, ka ¡ima t'irepirindi kuchicheri pakamukua eki kajtanapiringa! Menchani jucha no sesi exesïnga eki no sesi unajka k'uiripunguni, pero eki tata Diosïni jurajkunaka, materu t'aresïecha juchaari mintsitaaru irekatiks ka nomeni jucha sesi irexaaka.

Jauárani ka k´uanatsentani.
Ma sanderu kéri ambe ukua jindesti p´irani tata Diosïni p´amonguarikua. Jucha k´uiripuecha uekasïnga irekani k´amanrintskuecharu ka no uekasïngaks eski tata Diosï juchansïni puachintaaka iamindu k´amanrintskuechani ka intskuakajtsini ma jimbani irekakua. No ukua jukasti eratsentani nasï ima tumbi nitamakuaren japia. Imaeri no sesi p´ikuarerakua, k´arimaparini, k´arichaparini, uekaparini k´umanchikuaru jarani, uejpekua miaparini. Isï jindesti anchikuarita iaminduecha k´uiripueri, isï jindesti juchiiti anchikuareta: ¿Isï ji uekasïni eski intsïmbenaaka iamindu ambe ka isï sesi irekani? ¿ Uekasïni eskirini puachintaaka ka uaakani sesi irekantani? ¿ Jatsiskini kanekua sesi jakjkukua para irekani no ma k´amanarintskuanguni? ¿Uekasïni jakajkukuni tata Diosïni, jukarantani kanekua uejpekua ka jindeeni ma ambakiti k´uripu? P´irani p´amonguarikua jindeesti jurajkuni eski Diosï jindeeuaka tata Diosï, jurajkuni eski anchikuariaka para sesirini jajkuntani, no arhíati eskini p´amerekuariaka. Mojtakuareni jindeeuati k´umanchikuaru niantani ka exentani uajpani ka mimeni. Ima tumbí uekasïrampti k´uanatsentani taatemberi k´umanchikuaru ka no ma ambe uni. Jatsini t´irekua ambe pero no uaxakani kojtsikuaru t´ireni. No ma ambe intspeni, jinijku jarhani no uekaparini tumina indengui andapejka. Jindeesti uajpa jindésti sanderu ma ambe: tsanariparini, tsipekuareparini, p´amerkuareparini, ka intskuaparini t´irekua ka mamaru ambe iamindu k´uiripuechani.
Taatemba.
Eki uajapa ikichakuen irekaampka, uejpekua ttatemberi eki erontapka sesi p´ikuarenespti: exentaspti, uiriaspti kumantani, kamajchakuntaspti ka putirentaspti.
Uejpekua achaatiri uinirixapti no jakajkukuecheri, uejpekua Tata Diosïri kanekua tsipesïndi eki k´uiripu k´amanarintskua jatsiri k´uanatsentajka. Taatemba iamindu ambe intskuantsíndi: xukuparakua k´uichekueri; jukajkukua isï xararasïndi eski iamindu ambe sesi jaxekua jindéska para uajpa, arhí no potenduraati, eski ma no sesi anchikuareri; ka t´irekua ambakiti jindesti k´eri tsipekua. Isï jindesti Tata Diosï: uejepesïndi, intspesïndi iamindu ambe.
"Inde chiiti uajpa"
Uajpa sanderu k´eri uekasïndi istuikuchakuen irekani isï p´ikuarerasïndi eski mimemba. No usïndi sesi irekani: "inde chiiti uajpa", no mitentasïndi imaeri mimembani ka erokasïndi ma k´arichini para t´irentani imaeri panpiriechanguni, no para ma kojtsikuaru jimangui iamindu uachiecha t´ireaka. Imaeri mintsita no sesi uxati. Iasï jucha uaaka isï ukuarenchani eski uajpa k´eri: iskuksï uandasínga ka usïngaks sesi irekani eski uachiecha; ikiasïngaks jimboki Tata Diosï mentku isï uejpesïnga; nintasïngaks jimboki maruteruecha no istkuekaks eski jucha. Pero mirikurisïngaks eski no isku jauakaks k´umanchikuaru juchari taateri kojtsíkuaru t´ireni.
Uetarisïndi miteni puatsperantani. No istkuesti isïku irekani, uetarisïndi mentku isï sesi anchikuareni ka sesi exejperantani. Istkuesti kámanarintskua uajpa sapichueri eski k´eriiri. Tsïmangui, eski iamindu k´amanrintskua, karukusïndi iamindu ambe sesi irekakuani. Isï jindesti k´amanrintskua iasï anapu: no minarikutsperasïnga, "sïpajperasïnga" herencia, no t´irerperasïnga, ka mirikurisïngaks eski tata Diosïri uajpaecha ka eski "materu", juchaari uachiecha k ata Diosïri uajpaekajtu.
Kuanatsekua taatembanguni niantani.
Majku Kristuest indengui k´uramariajka escribaechani ka fariseuechani indengui juchansïni k´uramarijka paraki anchikkuariakaks puantsperakuaru. Tanimu k´uripuechaerantsentaraati: k´amanarintskua ka k´eri jukaparakua sapichu uajpaeri; no kurangukueri sander k´eri uajpaeri; uejpekua indengui juchansïni uiripandajka jatsiparini k´amanarintskuechani, uejpekua Taateri indengui juchansïni p´ikuntajka eski uajpaecha. Jindeesti jandykua kuaresmaeri. Janduestia para exentani tata Diosïri kanarikua ka eratentani eski uaakaks jurajkuani juchaari k´amanarintskuechani, ka isï uni t´irentani amindu ambe.
Achaati, Taate iamindu ambe jatsiri, jarhoatajtsini sesi exentani arhí jandu kuaresmaeri iamindu no sesi ukataechani ka isï jurarkujkaks juchaari uachiechani t´ungueni jjurarkuparini. Intskujtsini uinapekua para uni jucha jaurantani juchaari k´amanarintskuechanguni ka k´uanatsentani chiiti jajkiecharu. Tata Kristu juchaari Achaati jimbo. Ka isïstia.