periodicociudadrealhoy

Tsuntsuecha k´epekurikata.

+ Enrique Díaz Díaz.
Obispo Auxiliar de San Cristóbal de Las Casas

Tsimajkani Dominbu ordinario


Eki nitamakuaripka, jarhaspti ma tembuchakua ima iretaru Caná Galilea anapu, jima jarhaspti Jesusïri amaba. Jesús ka apostolecha p´imarinasptiks. Eki kaikua kueratapka, María arhispti Jesusïni: “nataru jatsistiks kauikua”, Jesús arhispti: “uarhíti, ¿ambeksï ua jucha? Notki usïngani ambe uni”. Ka ima uarhíti arhíaspti tsimangui jatsiratspeni japka: “ueje namanguiksïni inde arhiaka”. Jarhasptiks kuimu tsuntsuecha ts´akapueri ukata,ushirampti jatani iumu ekuatse litroecha mandani tsuntsu, tsimangui Judioecha atarhamka. Jesús arhiaspti tsimangui jatsiratspeni japka: uiníre tsuntsuechani itsïnguni”. Ka uinirasptiks. Jimajkani arhiaspti: “ p´ité sanititu ka pakue orhetspitini”. Isï usptiks, ka eki orhetspiti tsëmupka itsï kauikua ukata, no mitespti na unapka, jimboki tsïmangui jatsiratspeni japka tsimajku mitespti, ioarespti tembuchani ka arhispti: “ Iamindu k´uiripuecha jatsiratspesïndi uenani ambakiti kauikua, ka eki iaminduecha kauirini jarajka, jatsiratspesïndi kauikua indengui no ambakeka. T´u patsaska indengui sanderu ambakeka”. Arhi indengui Jesús uka ima iretaru Caná Galilea anapu ma uenakua sesi ambe ukua. Isï exejpesti imeri k´eri ambékua ka discipuluecha jakajkukustiks.
(Jn. 2, 1-11
Noteru ambe gasolina
Uiripekua jukandura sapichu “ El vochito” arhikata Tata kura Arturo eri kusïkaparini nirhaxati xanarhíru inchakuparini juatáru. Ts´akapuecha, xanarhi jarhaskukata ukata itsï jatarini, isï xanarasïndi eski mentku isï niguaka. Majkani, isku pakaspti ka notaru xanarhaspti. “Ambe jindéski?”, pajpiricha arhispti. Tata kura no usïrampti ma ambe eratseni, ambemangui ukuareni japka. Iamindu ambe exeantaspti: motor, bomba, batería ka isï xarharasïrampti eski iamindu sesi jarhaspka, ka motor no usïrampti menderu tishantani. Isíku arhiparini ma k´uiripu arhispti: “Nataru ambe gasolina jatasti”. Ka materu arhispti: Uinirhantaspkaks tanqueni ima iretaru”, ts´ejkukua gasolineri no marhoasïndi, uenakuaresïndiks no jakajkuni. Ekiks menderu exentapka tanqueni gasolineri notaru ambe jatanespti ka exentasptiks eski tanque porojchupka ka iamindu gasolina tsinchepka. “ Notaru ambe gasolina jatasti, no uáti xanarhani” Tata kura isku k´amatseraspti erhatseparini naxani tsima xanarhakuarepirini niantani iretaru. ¡Ma porota sapichu tsítaspti iamindu gasolina!
Jándu Ordinario arhikata.
Arhí dominbuuetenaxaka jándu ordinario arhikata. Nitamakuarestia k´uinchikuecha kanguarinakueri ka nitamaskaksia itsï atajperakua Jesusïri ka k´uanatsentasïngaks mentku isï jandu, ukuarekuechani mandani juriaterkueri, jándu irekuéri, ukuarekuechani tsangui mentku isï jucha uajka. Arhí jándu jukarasti kanekua sesi ambe, jindesti jurimbekua anatapueri, jindésti juskakua, isï jindésti eski k´ta ukuarekua, jirhinaparini , uandatsekuarepani, anchikuarepani, uni mamaru ambe. Erhokaparini eski arhí jándu ordinario arhikata, eski no jindeaka jándu no sesi nitamakuarikua, ka no ma ambe imangui jucha no sesi nitamaaka.
K´erati ukuecha ukuaresíndiks pauani ka pauani, mandani moskukua anchikuareparini, uekaparini k´uiripuni ka ambe p´irani. San Juanu intskusïndiksïni ma ambakiti uandakua indengui uaaka jorhendantsïni na chuxani Jesusïni, naksï ua jarhoani, naksï ua minarikuni ka naksï ua uekani. Tembuchakuecha Caná arhikata jorhedatsindiksïni uanekua jorhenguarekuechani tsanguijtsini jarhoataaka xanarhani pauani ka pauani.
Kejtsitakua.
Jesús angéjchasïndi eski anatapu isï xararaaka eski ma kejtsitakua ka San Juanu arisïndijtsïni eski Jesús ixu jaka, iméri amamba ka iméri discipuluecha tembuchakuaru. Jindésti ma jorhentperakua imangui juchantsïni exerajka pauani ka pauani eski Tata Diosï ixu jaka juchánguni mentku isï. K’uinchikuecha juchári iretecheri, tsïmangui iaminduecherika, jindestiks sesi xarharakua ka minda jindesti inde materu “kuinchekua” ka “kejtsitakua” imangui jucha iaminduecha p’imarinajka k’ejtsikuni. Jiní, jiningui jucha no xararaaka, eski materu k’uiripu ireta anapu, isï k’ejtsikusïndi Jesús amambaanguni ka discipuluechanguni. Ka sanderu ambe k’uinchikueri, k’amarasïndi kauikua ka no ma ne mitesïndi. ¿Nasï k’amara imangui no uetarijka eski k’amaraaka? Ka isï k’amarasïndi. San Juanu upirindi arhintsïni eski ireta Israeli ka jucharu parajpeniru kueratasïndi sanderu ambe ambakiti, jucha no exesïnga ka noksï ambe usïnga.
Iasï isï, noteru jarasti kauikua kurantperakueri, uekakueeri ka juakari jaroajperakua. Mirikurisïngaksï eski jucha ioarenaska kejtsitakuaru andajtsïkuerani iaminduechanguni ka isï usïngaksi no uekani jurajkutakuareni, jurajkuparini indengui sanderu sesi jindéka uekakua ka sesi irekakua iaminduecheri.
María atenta.
María, p’inandikuaru ka exeparini María, jindésti indengui eianjpejka ambe imangui kuratani jaka. Isï eski uanekua naandecha exesïndiks eski “ma ambe” no sesi ukuareni jaka, imangui k’eri ambeeka k’umanchikuaru. María no usïndi isku pakarani k’uratsekuaru ka iamindu ambe no sesi p’ikuarerakua imangui jurhanaka ka uandasïndi ambesï ukuarekua uetarijka uenani uandasïndi eski kueratasïnga kauikua eki Jesús japka ka tatsekua arhiaparini tsimangui t’irekua kejtsitani japka: “Ue je iamindu imangui inde chansïni ariaka.” Jindesti kanekua sesi ukua ka kejtatani k’erati uandakuechani: uenaparini jucha miteparini ka jucha minarhikuaparini ka kejtsïtakuani Tata Diosïni, ka menderu jirhinaparini sesi ukuechani na enga Jesús uekajka. “Uni na enga Jesús arijka”, isï exerasïndiksïndi uandakua jakajkutiechani, ka mentku isï k’uichinaaka tsipekuanguni iaminduechanguni, ka jucha itsïmaka jimbani kauikua, tsima jimbani janduechani ka jimbani irekakua imangui Jesús uekajka ka indengui Jesús uandajka no jindesti indengui k’uiripu arijka. Uandakua Jesusïri uekasïndi eski iaminduecha kejtsikuakaksï ka iaminduecha t’ireakaksï. Materu jindesti sanderu sesi p’ikuarerakua ka no uekasïndi imangui no sesi eratsejka ka no sesi p’ikuarerajka. Uanekuestiks uachiecha tsangui no ma ambe jatsika ka k’omu jakuaru irekani jakaksï. Tsïmeri uandakuecha k’eratiestiksï, jimboki jurajkumenastiksï no sesi irekakuanguni. María exesïndi, ka k’eri jakajkuti no uxindi isku jarani pakarani.
Tsuntsuecha k’epekurikata.
San Juanu, exeasïndi mindechani, ka juchantsini arisïndi eski kuimu tsuntsueska: no sesi numero jindesti, k’uetsapestiks jimboki tsakapu ukata jindestiks; no ma ambe jatarini, jindepirindiks kanekua ambe jatarakua; jindesptiks ambakerakueri urhakua. Tsïni tsuntsuecha tsïngui tsïtaka xanariniru, tsangui kakakuarika, ka irekakuani tsitajka, Jesús uekasïndi eski uinirantaakaks itsïnguni, ka no urhani k’uiripuni ambakerantani, urakuareaka tsipekuani majtakuntani, tsipekuanguni, irekaparini k’uiripunguni, sesi irekakuaru jimbani temba uchatiechani. Upiringaks exeni jorhentperakua juchari jimbani uachiecharu, jimangui tsïncheni jaka sesi irekakua, jimangui uekakuani jurajkutajkaks, jimangui jirinantajkaks no sesi ukuechani, jimangui k’eri uekakua kueratajka.
Uanekuestiks mindaecha tsimangui arhi uandakuaru San Juanu intskujkajtsini. Jue sesi exeni arhi ma uenani janashkakua Jesusïri, ka jurajkutakuare eski jucha k’urhamarinaka ambe jindeski juchari anatapu. Jue jucha k´urhamarikuarini noksï tsipekua tsïtaski ka sesi irhekakuajtu, ekiks tsïtani jaka juchari minixekua, ekiks no exeaka ambe emangui jucha uetarijka, juchajtu uetarinchasïnga juchaarichani tsuntsuechani k’epekurikata uiniraantani itsïnguni juchari uinapekueri ka juchari jakajkukuanguini, ka isï Jesús mojtakuaka kaikua tsipekueri, tsipekueri ka intspekueri.
Tata Diosï, t´ungui intskuaka chiiti uejperakua iamindu k’uiripuni kejtsitakuaru auandaru anapu, mitachiajtsini juchari eskuechani, eski jucha sesi eratseaka ka juchari mintsita k’eriuaka, ka juchari sapichu ukuecha, mojtakuakasïni Jesusïri uinapekuanguni, jindeakaks mindaecha uejpekueri, tsipekueri ka sesi erajpekua intskuauaka iamindu achaatichani.
Ka Isïstía.